ايڊيٽوريل

تحقيق جو ڪم ذميواراڻو ۽ تمام ڏکيو، پر اُن جا نتيجا هميشه ڪارگر ۽ لاڀائتا ٿين ٿا. اڄڪلهه جي دنيا ۾ تڪڙي تبديلي يا ٽيڪنالاجيءَ ذريعي جيڪا به ترقي ٿي آهي، اُن جي پٺيان هر طرح انساني ذهن جي ولوڙ ۽ تحقيقاتي ڪاوشن جو وڏو هٿ آهي. ان ڪري ئي سُڌريل مُلڪن ۾ تحقيق لاءِ تعريف لائق موقعا مُيسر آهن. ڇاڪاڻ ته اسان جو شمار پٺتي پيل معاشرن ۾ ٿئي ٿو، تنھن ڪري اسان زندگيءَ جي هر شعبي ۾ سھولتن ۽ وسيلن جي اڻاٺ جوشڪار آهيون، جيڪا اٺاڻ بهرحال معيار تي اثرانداز ٿئي ٿي، ساڳيءَ ريت تحقيق جي شعبي ۾ پڻ اسان وٽ نتيجا خيز تحقيق جو تعداد تمام گهٽ سامهون آيو آهي.

معياري تحقيق جي اڻاٺ سماج تي ناڪاري اثر وجهندي آهي ۽ سائنسي انداز ۾ فيصلا ڪرڻ ۾ پڻ ڏکيائي پيش اچي ٿي، جنھن سبب ترقيءَ ۽ خوشحالي تي اڻٽر اثر پوندا آهن ۽ ڪنھن به شعبي ۾ پاليسي سازي ۽ منصوبابنديءَ جا پختا بنياد رکڻ ڏکيو ٿي پوندو آهي، تنھن ڪري تحقيق جو معيار وڌائڻ خود سماجي ترقيءَ جي لاءِ پڻ لازم ٿي پوي ٿو.

’سنڌي ٻولي‘ جرنل ذريعي اسان سنڌيءَ ۾ معياري تحقيق کي هٿي ڏيڻ جي ڪوشش ڪريون ٿا، ان ۾ شامل تحقيقي مقالن کي جانچ جي هڪ مڪمل طريقي ڪار مان گذاري، هر طرح اطمينان بعد اشاعت ڪئي ويندي آهي ۽ اِن مرحلي دؤران ڪڏهن ڪڏهن خود جرنل جي ڇپائيءَ ۾ پڻ دير سوير ٿي ويندي آهي، پر بهرحال ’معيار‘ کي هر حال ۾ برقرار رکڻ ئي اداري جي ترجيح هوندي آهي ته جيئن معياري تحقيق جي روايت کي هٿي ڏيئي سگهجي.

’سنڌي ٻوليءَ‘ جو هيءُ شمارو پڻ اهم تحقيقي مقالن تي ٻڌل آهي ۽ اسان جي ڪوشش رهندي ته اڳ جيان هر جرنل کي وقت سر آڻيون ۽ اُن جي معيار کي پڻ بهتر کان بهتر بڻايون ته جيئن سنڌي ٻوليءَ ۽ لسانياتي تحقيق جي شعبي ۾ هاڪاري نتيجا سامهون اچي سگهن.

جرنل جي هن شماري کان ڏيهي صلاحڪاري بورڊ ۾ تبديلي آندي وئي آهي. اسان سڀني معزز محققن ۽ عالمن جا ٿورائتا آهيون، جن هِن سلسلي ۾ ٻانهن ٻيلي ٿي ۽ علمي سھڪار جي خاطري ڪرائي آهي. صلاحڪاري بورڊ جي اڳوڻن معزز ميمبرن جا پڻ ٿورائتا آهيون، جن وقت بوَقت رهنمائي ڪري هن جرنل کي معياري بنائڻ ۾ سهڪار ڪيو.

ادارتي پاليسي ۽ ليکڪن جي رهنمائيءَ لاءِ تفصيل جرنل جي ويبسائيٽ توڙي ڇاپيل شمارن ۾ ڏنل آهن ته جيئن محققن کي لکڻ ۾ وڌيڪ آساني ٿئي.

اميد ڪجي ٿي ته معزز محققن ۽ اسڪالرن وٽان  اڻ ڇھيل نت نوَن موضوعن تي تُز، حتمي ۽ نتيجا خيز تحقيق اڳيان ايندي.

ڊاڪٽر راز شاهاڻي

ايڊيٽر